ولفونا ساكتين و نهار هضرنا ما عجبهم حال

شكون اللي قال ؟
حكامنا قلوبهم قاسية حجر!!!!

و شكون اللي قال ؟
اللي بغا الحياة
خاصو يستجب للقدر .....

شكون كان سباب هاذ البلا؟؟؟
أقوام عايشة في العز....
و ناس محرومة ليها تنظر.

شكون اللي سد الصباح
بليل طال ظلامو؟؟؟

و شكون طلع على ظهورنا
باش يكبر في مقامو؟

شكون كلا ما شبع
و مسح فينا وسخ يدامو؟؟؟

و شكون حبس علينا الماء ديال الواد...
و خلانا نشربو من الضاية ؟؟؟؟

و شكون اللي كنز موالنا ...
و قال لينا هذه الدنيا فانية؟؟

شكون سرق لينا ألوان البهجة من الحياة ....
و خلا لنا الظروف القاسية؟؟؟

شكون ؟؟؟؟و شكون ؟؟؟؟؟ و شكون؟؟؟؟

نوض فيق يا جنس يا مغبون!!!
قزبو ليك نهارك ...
و حرموك حتى من الشمس...

قلموا ليك ظفارك
و عاد كلامك كله همس

لا من شاف لا من سمع..
كلها يضرب على عرامو!!!


شحال منهم كان حاسب راسو سبع...
نهصروه تكمش و عرف مقاموا.

تأملت أمري و شحال بكيت...
لقيت راسي في حرب ....
سلاحو قلم و قافية.

طواحن الهواء عليها ما قديت...
واش انا دون كيشوط
و لا رومل و لا ولد شافية.

الهم و التخمام عياني ..
و منك يا دنيا قلت خزيت.

صيحت صيحة باش نفاجي همي ...
ما سمعوني ولاد العفاريت

كلها مدهي مع شغلو ..
و الضعيف ليه الله.


اذا بغيتوا تعرفوا بلا ما تسولوا..
راه اللي طاح على شي داه.

الهضرة الكبيرة و الأخلاق الحميدة
بقاواو مسجونين في صفحات الكتوب.

رزق الضعيف داز لجيوبهم...
برق ما تقشع وخا كلشي محسوب.

الكلاب ما تنبح غير الا ...
ما شمشمت ريحة الغاشي!!!!!!

و الذئاب ما تفرح .....
غير اذا ما فرسات قطعان المواشي.

تخميمة مضيومة

مشا عيد و جات اعياد
فرق كبير بين العبد و الأسياد

نهار تابع لخوه يجريوا
بيك لنهار الميعاد

ومنزلة تنسيك في اخرى
و اللي تملحس بحال الكلب ينال المراد

لا زين لا مجي بكري
سال عليكم شلا مداد

زدتوا طغيتوا حار لي أمري
و الزايغ على الحق تجبر و شداد

كلمني خيالي في ليل
ضوه على دمع شمعة

قد ما كدا نورها
حماة نار الغبينة في قلبي

و صحت صيحة مغبونة
و هزيت كفوفي ليلة الجمعة

نترجاك آلعالي تظهر برهانك
في الخو اللي عاد لخوه يسبي

مالك آبنادم مالك
عادت حياتك خوف و خلعة

و علاش يا نفسي تباتي
ليلك تعدي و تحسبي

المقام ما يكون بسلهام حرير
و لا جلابة ضرعة

ما زين المقام غير حسن الخلق
و من دار بحساب العبد و ربي

النـــــــــواعر

شلا ما نوعرتو في الخفا
و ظنيتو الكسيبة نسات ما دوز عليها الذيب
بعد ما كلتوتا النوى لحتو الجلفة
السارح حكم الضرعة و بقات الخرفان بلا حليب
الساقي من راسو في يديه مغرفة
يقدم من بغى و يوخر عزيز النفس و الحكيم و اللبيب
فطامة الرضيع حولين بالوفا
و حصانة العزبة في زواجها لا يتفجع قلبها بغدر الحبيب
من زيناتو حليب بيوضة و صفى
و من زيناتها بسمة خدودها مبشورة كيف الورد في العزيب
ايامكم زهو ولينا الضرك و الحلفة
قريب موالين العرس يشبع و البعيد ليه العظام و لو كان صليب
شكيت ليك العالي حينت الحالة ضعيفة
و الخير يا سيدي يا ربي من عندك جانا
و زدت حمدت الله الأمور خرجت طريفة .
و الحكيم لي تمنيناه ينصفنا عرانا
لبست دربالة و شي لباسو حرير و قاطيفة
و شلا من في قلبو الغل و نسى بللي الدنيا فنيانة
قلت نتزين درت صدفة
و شلا من دار عقيق و لويز و لوبانة
بقيت نرصد الكلام لقيت راسي لا حرفة
اذا ردك البخيل عند الكريم تبات سويرتي و عليك ا مولانا
اللي في الزلط واحل و اللي عايش في الدفا
نتحسر على نسا بغات تزين بقات تدور في الزنقة عريانة

السياسة مـــمــــــــــــنوعة

اسيدي شوف و سمع
نهار تحقق تردع
هادي الدنيا عادت تخلع
و بنادم ما بقا بغا يشبع
و ناري على اللي ما يشبع
راه شي نهار غادي يتفرقع
التيلاد قبل ما يسبع
خاصو من كونتو يتجمع
في زمان حسب حساب
ما بقا لا معقول لا احباب
زمان تقصار و تقشاب
و طريق الله عادت تتعاب
أنا عييت من التقلاب
واحد اخر مفتوح ليه الباب
ايه سيدي عندو الصحاب
و مخدم قانون الغاب
و بكثرة الأحزاب
عاد كلشي كاي تعاب
يا ربي يا وهاب
خذ لي حق في اللي كان سباب
المعارضة كاتشرق
التناوب جا غرق
الوفاق كايصفق
انا كانشوف ما كانبرق
السارق كايسرق
مع خوتو ما بغا يفرق
قلبي غادي يطرطق
على بلادي اللي كاتغرق
يا ربي يا قهار تمنيت في حياتي نعيش نهار
تفضح الأسرار و يبان الشفار
يا شفار يا شفار و راه تخلات على الدار
ناري على الديموقراطية
ناري على الشفافية
نزاهة انتخابية
حكومة تناوبية
تنمية بشرية
مخططات مستقبلية
ديما كاتقولوا ليا
بلي حياتي ملك يديا
لقيت راسي عبد و مرهون
لحساباتكم السياسية
هادي حملة انتخابية
و كلامها غليظ صعيب علي
في زمان عبادة الفلس
و لعبار ديال الرجال باللبس
الوعود كاتعطى في المجلس
و في الخفا كا يتلعب الفلس
و صايتي ليك يا الناعس
انتاخب على اللي ديما ناعس
في حياتو بيك ما حس
و بامتيازاتو على باباك أسس
قانون اللي يحمي بيه حقوقه
و اللب عايق يدخل سوقو
في خيراتنا كايفرقوا
و حنا غير كانبرقوا
كيف الفروج كانعوقوا
كانقولو قوقو قوقو ...........
تمنيت عليك يا رحمان
باش تبين البرهان
في زمان بنادم هربان
من واقعو ديما سكران
تقال لنا الخمر حرام
في الزناقي كاين بالعرام
يا ناس يا كرام
بغيتكم تعيشوا في سلام
لا تعيشوا عيشت اللئام
لا تمومتوا موتة كفار
عار الجار على الجار
تغدرت الخاوة و تدار العار .

الكلب زين الوفا

الكلب معروف بالوفا زادو جوعوه باش يتبعهم
حفاو له سنانو في الخفا و تيقنو عمره ما يغدرهم
طرقوا ليه المسمار على الحفا و كان حب المال هو سبابهم
بين الخو و خوه عاد الجفا و راه جاي نهار الذيب ينفرهم
لاقاني الكلب بن الكلب و سالني على قفيتي دايما هاجياه
حكيت ليه على حلم صبايا ايام كنت باغي نعيش طلاقة الطير الحر في سماه
و بقى الديب يزين لي فعلي و لغايا و نهار ضربت الفقد لقيت لي عطى الله عطاه
يا سعدات من ما خدا من زمان و دار بوصايا راه يديه و يجيبو ينسيه يغرمو بلا هواه
عمري ما سرقت و نهار درتها حرقتني اللقمة في لهايا بعد ما كان الواحد جوعان صدقت الحرقة مصوماه
عمرني ما شبعت و تعففت على كل غاية شحال من ضرعة ناشفة نفرت الرضيع من مو لي والداه

تسريحة اللسان

الشــــــــــاري عــــطــــــــى جـهدو
و البايع طلع للجبل و زاد في الدلالة
كل قاضي حكامو بوحدو
و كل عالم بحب المال طال مقامو في الجهالة
باب ريح الطمع نوصيك سدو
راك تسهى تصبح هالك ما تلقى مقالة
ليهم الحساب مثني معانا يفردو
حكامهم موقوف التنفيذ و حنا ساري المفعول لا محالة
يد شي فوق شي و يد الله مع الجماعة
تقضي غرضك خصك ترشي
و تقول الناس فيها مجاعة
مشرط الحناك في كرشو يخشي
و خرج من دار الدين و الطاعة
صليت على نبينا احمد القرشي
عريس القيامة و زين الشفاعة
تأملت أمرهم و رصدت كلام
قلت يسمعوه يتصلح حالهم
عاد حالهم كيف حال سرب حمام
غيامت السما بدلوا مقامهم
يا الفاتي في الدين وقفة نظام
و لا ما عجبك حال ناس لا تلومهم
لا تعادي من خالفك في كلام
و لا تجادل و تكره الناس في بعضهم
جميع الجنوس ولاد حواء و ادم
و جميع الديانات وحدو الله اللي خلقهم

الذيب الخارف والحمار الهرناط

شرقت الشمس الغايبة و جاني وحش الغمام.....
نزل العالم من المرتبة و طلع من ما عنده مقام!!!!!
حمير حرة تزععرط في الرحبة
و خيل في مرابضهاقلال لها الشان.....!!!
شلا من تزاد في فمه معلقة مذهبة
!!!!! و كاين لي في قوت يومه تهان
أنا مغربي من جدودي ومن با
و لي شك كلامي ليه برهان!!!!!
نوصيكم يا شباب لا تطولوا مقامكم في الغربة ر اه
الحمام و لو يهجر في المشتا تصيف الوقت وزيان في عينه المقام!!!
الكرم عطا غلتو و الوكال ما جمد الله
هم كلشي يعمر سلتو و المضيوم ما صاب دواه!!!
الصاحب في راسو غايتو بغا يتغدى و يدي عشاه
و المعروض لي ما يقنعو الموجو د
غير فرقو و قطع لغاه......
و كيفاش علاش دوارنا خواه العلام ؟؟؟؟؟؟؟؟؟
ياك و ما ما بقا فينا يدام؟؟؟؟؟؟
العلام خوا الدوار في نصاصة الليل
يا سعد من تخلات دارو على كلمة حق ما عاش دليل!!!!!
حاكم القبيلة صدر قراره سفهو العلام و من كان له خليل
مول الحق الشيطان غارو
ايه و الأفاق مرزن و ثقيل!!!!!!
الديب جهل و هبش المطمورة تشبه ليه عضم في كبالة
السارح فطن لو و جبد معاه بمقلاع من سطح النوالة
تقلب تباطين الديب و بقا يسرح في الفصة كيف البهيمة
و منين عشات الليل خلا يدخل لغاره و بغا يبيت في الخيمة
خواتو مولات الدار و بقا يصيح ها عارك اختي حليمة......َ!!!!!!
و ياك الديب غار ديب؟؟؟؟؟؟؟؟...........
يا سلام يا سلام
شحال طاحت من صمعة و عديتو بالحجام
يا سلام يا سلام
خليتو على مشية الغراب و بغيتو تقلدو الحمام
يا سلام يا سلام
فينو السلام و فينو النظام؟؟؟؟؟؟؟
يا سلام يا سلام
شحال منو تصرط لحم و لاحو فيه غار العظام ؟؟؟؟؟؟
لا سلام ولا سلام
على الحروب اللي شاعلة في العالم......
لا سلام ولا سلام
على حياتي لي ما بقا فيها يدام .......
لا سلام لا سلام
لي ربى لحية يبدى يفتي في الاسلام......!!!!!
لا سلام لا سلام
كثر اللغى ها كيف كيف ها العدل و الاحسان
لا سلام لا سلام
كلها ينش على كبالتو و فينو البرهان
ايوا سلامي ليكم كاملين ..........................

......
حمار هرنط في القاعة
و اقسم يايمانو لجام الرحى لا زاد فيه ساعة
الخماس تعجب من لحمار
و نادى على مول الارض باش يشوف ليهم قرار
سولو لحمار على تهرنيطته اللي خلعت مالين الدوار؟؟؟؟؟؟؟؟؟؟؟؟
جاوب بلي البهايم كاملة تشقى في البحيرة و تروح
و هو المضيوم ثقل الدنيا ينقله ختى ظهرو تفلحَ!!!!!!!!!!!!!!!!!!!!!!!!!!!!!!
تحمعو الخماميس و ضحكو على الحمار لي عتارض
و كلهم عارفين باللي الخماس الى ضرب في الخماس كا يكون صداعهم من سعد مول الارض
و تجمعت البهايم و هناو الحمار على نضالو!!!!!!!!!!!!!!!!!!!
و قالو لو من غامر نال و من خاف ما يسال والو
غمز الحمار و خاف على حياتو!!!!!!!!!!!!!!!!!!!!!!!!
و زاد تيقن و ثبت منين خميع البهايم سولاتو
الى الحمار بن لحمار ما هز ثقل و ما شقا على سيادو في البحيرة
علفو زايد فينا و خدمتو الى مادرها البغل نفرقوها على ولاد الديور الصغيرة
و من تمة تيقنت الحمير بلي الحمار حمار ليه الثقل و الدراس
و الخدم عبيد مول الارض و ماكلة الشياطة للخماس

ايا مولا الامان فين النظام
الكلام المعسول الترفاس و التقدام
عايشين في غابة كبيرة وحوشها كثيرة
هذه غابة ما هي بحال الغياب
ضايتها مسمومة و مراضها خطيرة
اللي شرب من ماها تجبر و ساب
اللي شاط على السبع لصحاب النفوس الشريرة
وصاحب العفة ظنه خاب
تلاوحت فيك ازماني ما هنات لي فيك سريرة
بكيت على وعودك ازين الكلام الكذاب
عندك وعود حلوة عسل
لعقل بنادم تخبل
كلامك ينشف بحر وسط الوديان درتيو جبل
و في رمشة عين السين يعود جيم
الطليق يعود سجين و السياسي المسكين
و ركبنا في سفينة سيادي و سفينة الله
رايسها مهموم همو المال و الجاه
حكيم غابتنا قال ليه قول انشاء الله
و يا الطامع في هم الدنيا راه خاب رجاه
اللي سلاتو خليلتو موتو اهون له
واللي بكا على فراق حبيب الدنيا غراه
يا الداعي للخاوة يا الداعي للحق
يا هازفي يده هراوة و لحقوقنا تسحق
بوعود و كلام حلو لمصالحك تحقق
رد بالك من دعوة المظلوم و بخوك بنادم رفق
شحال منه عظيم تجبر مات في دار الحق
شحال منه مظلوم طغيانك به لحق
وسخ الدنيا يبقى فيها نحمد ربي اللي يرزق
مكتوبي بين يديه و حسابي معاك غدا نهار الحق
يا السامعني عذرني و لا تلومني على كلام
ماني وازن ليه قافية ما عارف معناه
المعنى بالمعنى و قليل النباهة يفهم
و الشاطر في حياته اللي من كلام الناس يسلم
لا حنين لا رحيم محاين الدنيا و تعلم
قلوب الحجر ما تعف ولو كانت الصخور تتكلم

وزيعة الهموز

اواه اواه وانتوما شوروا علينا
الا كنا حنا تلاميذ اليوم ليكم و غذا راه لينا
طحتو على الزرود و البرارد
و عيدنا بالماء و السكر و فارينة
طاحت الذبيحة تمرمدتوا معها في الأرض
شربتوا دمها كلتوا لحمها خضر ما شبعتو بغيتو تكملو بنا
طير طار علا في سماه
زق زقة جاتني على كتافي
طحتوا على الواد نشفتوه من ماه
ما شبعتوا ما بغيتو تقولوا صافي
يا الحالب القرة حليب
و يا جاني غلة الأشجار
كون قانع و دير بحساب الغيب
و احمد و اشكر الرب القهار
و راه سر العوينة تنشف و لو طال الزمان
و راه غلة الأرض تخرف و اللي ما عف يتهان
محايني على الأيام دايزة تشالي كيف البرق
البقر عاد ليه الشان
و مول النفس عاد بعزة نفسه يتحرق
و انا ناعس شفت في المنام
جنوس هاجمة ما تحكم بالحق
يسلبوا ملاك غيرهم و كريم القوم يتهان
اللي في الارض ديالهم و اللي في السما يسالوا فيها الحق
طاحت الصمعة و جات السبة على الحجام
شلا مثلات على حالكم تصدق
هاللي باع روحو و شرا ساعة من زمان
هاللي وهبت ضناها باش من حر الجوع تتعتق
ها اللي تقهر و تعاهد مع الشيطان
و اللي أله المال و عصى الرب الخالق

مالين الحال

التقوى بالتقوى و الحكمة قوة
لا تتبع هواك لا من مقامك تهوى
حكيم حياتو دار لفمو لجام
و مواصل قوامنا ما نفع فيها كلام
ها اللي شرا طوب و ظنو جوهر
اللي تباع في سوق هواه و ظن راسو مضطر
شاكي باكي من سقم حياتو
ظان باللي صاحب المال عايش من سعداتو
حلاوتك يا دنيا ما يشريها مال
و حالة عذابك يا قلبي ما يشبهها حال
فتيان تعصى ربها و تبات مخمورة
و نساء صابحة تتحلق باش تزين صورة
لله يا أقوام يا عايشة مغرورة
لله يا حسناء و يا زينة نظرة
كلمة حق على لساني واقفة محصورة
و بكاك يا عينيا ما يحد الباس
حوال جنوس العدم عايشة مهمومة
فعايل و عادات في ديننا مذمومة
شقاق و نفاق و مقالب مخدومة
ناس عايشة و شلا فئات محرومة
كاين اللي تحرم من حقوقو في و طنو
و اللي بغيتي تشريه عطيه لبطنو
ها اللي شرا الدنيا و باع الدين
و يا الحلف قسم و العفة فين...........

الزين و الثباثة

زماني عايش غريب و براني
لله يا الزينة و زينك سباني
سيادي لا تلوموني بلايمة
و لجام هواك يا قلبي من بين يدي هربان
هادي حكاية عذاب قلبي واه يا ناسي
بعد ما كنت هاني في بر الأمان
شافت عيوني ما بين صبايا
شابة و خمرية و زينها فتان
عيون عسلية تحكي على زمان
براءة و خاوة حب و و ئام
زمان ما هو بحال زماننا
حكم فيه الظلم الجور المال و الطغيان
صبية بيك أنا هايم و شعورك خملية
و خدودها تشبه فاكية تروي العطشان
حكام قبيلتي ناضوا لاموني
قالوا لي يا الحكيم أشنو عجبك فيها
هذا سحر صابك ولا توكال
و الحب في زماننا عاد من المحال
حب الحبيب لحبيبو من أجل غاية
و ما هو احساس نبيل و لا حسن خصال
رديت عليهم يا جنوس يا هبال
محبوب الله من تخشع في شوفت الجمال
ندامتي على يوم كنت في حياتي جاد
كانبدر البدرة و كانتسناك أ يوم الحصاد
لقيت راسي عايش لا حياة لا ميعاد
حالي حال بهيمة درست كل ما حرثات
لله يا نفس نفس يا الامرة بالشر
و يا اللي تابعك في قبرو بيدو يحفر
الأيام دايزة تجري في عمرنا تنجر
و الطامع فيك يا دنيا بهوانو ما يشعر
جريت جاريت ما كسبتك يا دنيا
ظنيت راسي فيك خالد و انتيا الفانية

دنـــــــــــــــــيأ

إيه إيه يا دنيا
دنيا ليلك طوال
و شمس نهاري
ما زالت غايبة
مدرقها غمام
محايني لا مي لا بابا
و فراق الأحباب
إيه و غدر لصحاب
قالوا زمان
اللي يحن يتمحن
و قال حمو رابي
في القصاص السن بالسن
قلوب في الخفى حاقدة
و تنافق في العلن
ناس لخوتها حاسدة
و بنعمة الله و تمن
دنيا يا غرارة
لدخلها تعدم
و أول ما يفعلوا الرضيع
انه يصيح من كثرة الغم
حكايتنا مكتوبة على صخر
و مدادها دم
عاد شي يكيد لشي
و الهدف عند كلشي شكون اللي يحكم ؟؟؟؟؟؟؟

مـــــالي؟؟؟؟ مــــــــــــــــــــــالكم؟؟؟؟؟؟مـــــــــــــــــــــــــألنا؟؟؟؟؟؟؟؟

عيـــــــــبنا كاملين واحد
لي فيه شي بلية يتستر
و والاد عبد الواحد كاملين واحد
ناض في رمضان و بغى يفطر
قالوا ليه : زعزتي لينا العقيدة
بحال الا هاد الايمان مشدود غير بسبيب و لا بوقيدة
ايوى و الرشاوي و ضريب الكاس
و نهار المسؤول اللي طالع من ظهر الناس
يعني من ظهري و ظهرك
و راه ما يحك ليك غير ظفرك
و عنداك يمشي الشيطان يغرك
راه الجنس اللي ينفر ثراثو
بالنسبة لي موتو حسن من حياتو
حينت جميع الجنوس باخلاقهم
نتوما عجبوكم الروم و درتو بحالهم
تسمع غير: بونجور - سافا – كومان فا تي
خليتي العربية و عدتي بلغة موليير تستيتي
قلت نبارتيسيبي و نشارككم في هاذ اللغا je participes
الحوار ديما مفتوح و و لا الدخول للجامع بالبلغة
هذا زمان لالي سان غوتوغ L'aller sans le retour
أنسي جو فو سوهيت ان بون فتوغ !!!!!!!!!! ainsi je vous souhaite un bon ftour!!!!!

منين خانتني البلاد

تنصبت الحلقة
و حنحن الرقاص
على بداية الحكام

الضعيف ليه المشنقة
زدتوا الشحمة في ظهر المعلوف
أحياني على الأيام

عباس و رباعتو رصاوا الدقة
كلاوا بيديهم و رجليهم
و وصاونا بحب الأوطان

من نهار عشت فيك أ وطني
شفت الجوع و الشقى
ليهم العز و الدلال
و لينا الذل و الهوان

لا تعليم لا صحة و لا نقى
واش اصلاح التعليم
هو بتفراق شكارة على كل قران؟؟؟؟؟

ليكم المناصب و العز و الرقى
و لينا نغص العيش
على انسانيتنا اللي كاتتهان

قسمتوا خير البلاد شي ما بقى
ولادنا ليهم الضياع
و لولادكم كندا و ميريكان

انت وزير ولد وزير
ضاحكة ليك الأيام
تبتينا بكلامك لكبير
خنتي العهد و عاد
همك تعمر البزطام

خاب ظني فيك أ وطني
كنت ظان الأسبقية للهجالة
و الفقرى و الأيتام

و ترجيت من العالي جواب لسؤالي:
واش عند المظلوم ما يدير
إذا خانوه الحكام ؟؟؟؟؟؟؟؟؟؟

المــــهـــــــــــــــاجــــــــــــــــــــــــتتر

كما قال أحد المفكرين الافرنج فان الانسان عندما يختار الهجرة او المنفى فانه يفقد مكانه في العالم ..........


يا المهاجر
يا السامح في حبابو
يا حالمين حلم
في شبابهم تغصبوا
يا الزارع في حياتو ريح
يا خائن العهد
يا بو كلام فصيح
يا الناسي الله و تابع المال
يا النادم على كل ما يتقال
قومتي البشر بما عنده في جيبو
يا هالك راسو و سباب عذابو
يا من تنكر لتراثه و تبع الموضة
و جثات بناتنا في الزنقة معروضة
حرث أ حراث شمسنا غادا تشرق
لا بد للظلم ما يزول و غادي يظهر الحق
فرحوا يا الأولاد
و لا تيقوا بكلام اللي قال
أرضنا أرض خير
و شلا ما دازوا فيها من رجال

الحـــــــــــــرار

سديتوا و حميتوها علينا بالغوات
قلنا نحلوا ما لقينا.........
سوارت لا بيبان لا ماليهم
قفال البرمة طاح ......
و البليلة تحرقات
بغينا نسولو: ....
واش اللي جهر بافكاروا.......؟
أجي بعدا انت......
معانا و لا معاهم .؟؟؟؟؟؟؟؟
لسان حال المزلوط......
عليه السوق حمات
مالين لافيجي تخلعوا.....
و دخلوا سوق راسهم!
الأحكام نازلة عليهم....
من كل الجهات
ما بقاوا عرفوا .....
كيف يديروا في تحرارهم!
تأسفت عليك.....
آ يام السماح و المصالحات !!!!!
لقيت اللي خان تجازى
و أنا اللي وفيت......
بقيت خديم عندهم !
القلم اتكرى.....
لشلى فئات
من بعد ما هيبوا .....
يمين و يسار هتروا!
بداوا يهيشروا في بعضهم
شحال ظنيتك آ الحرار.......
معصوم من الزلات !!!!!
و نهار وعيت .......
صبتك كيفك كيفهم!!!
تباعت الذمة.....
و شلا من تبع......
الكاس و اللذات.
و الناس اللي و كلوك ...
عاد نهارك طالع من ظهرهم!!!!!!
سعدات من كلا الغلة......
أما حنا الشياطة و الفتات.
واقيلا سعداتنا حنا .....
اللي ما بعناش الماتش و عدنا بحالهم .

المشتاق الا ذاق

سد تلقى ما تحل
جا يداويها عورها وحل

شي في الخير و العز مكسل
و شي مقلوبة عليه القفة وفي قوت يومو تذل

اللي عطاتوا ياموا زاد هرول
و اللي بغا يسلك عظامو يجلس و يتول

غادي في طريقي هايم قال لي علاش كاتسول

حكيت ليه حكاية المنيخيب
اللي تحط علينا بباراشوت « parachute »
ترفح و رحل

و عاد حالي حال مجيذيب
حياتي كلها غادى في لاشوت « la chute »
و بغيناه لا يلقى لنا الحل

قال لي وايلي راك في المغرب
عدي شوية بأتاي و الزيت
من هنا عشر سنين غادي تتعدل

قلتوا : عديوا تبعناكم
عشتوا في الخير ما حسدناكم

عباس يلحس
شياطة المرقة تدوز لولادو

ياسمينة تفرنس
اللي مشا للسبيطار هذاك النهار حدو

التراكتور تأبلس
صال و جال في البلاد اللي في الطريق يحصدو

ذكر الحمام ما بقى طار جلس
غدر الاصحاب صعيب يا ويل من بانت فيه بوحدو

مول المصباح يأس
ما عرفنا أش من طريق نشدو

القافية كاملة على وزن أس من اليأس

تمنينا عليك ألعالي يكون فينا قوم يزرع
باش الماجيين يلقاوا ما يحصدوا

الله يهدي ما خلق

التراكتور دار كاتريام و حمر في 2012
سي بوحمامة بان فيه البلان
ايه و الغدر أمزوار علاش
هي راه باش تقتل باش تموت أسجان
الخير بالخير و الشر بالشر
و الدنيا دوارة
وصيتي ليك وحدة لقيتي تنفع ما تضر
بعد ما تكون غالب يقلبوا عليك الشكارة
.لو كان دامت لغيرك ما توصلك
و تعود علينا تتخنتر
دارو بيك صحاب الهموز
سميتي تراكتورك أصالة و معاصرة
تحلوا ليكم بيبان السعد
هاحنا غادي نشوفو هاك و أرى ما فيها حزارة
كلها يتهافت على تسييرنا
تقول حنا زحاحيف و لا محاجير
اللي جا يقضي مصالحو ينفرنا
ما كاين باس و دهن السير يسير
الحقوق التنمية التخطيط الكلام قتلنا
عايش نهاري نتسنى يصدق ليكم التغيير
ًَآ الشاف!!! راه حتى حنا بغينا نعيشوا!!! عيينا
آجي مال مك دابا؟؟؟؟ سكتنا و لا سير..
يا حسرة عليك أبلادي
عادت كلمة الكل تتجمع على طارة و بندير
و يا حسرة و سمحوا لي أ ولادي
على شظف العيش تيقت كلامهم الكبير...
و انت لمن تشكي و على من تنادي
بان العيب و ما بقا عندك ما تدير..

ايوى كيفاش بقينا هكذا شي واكل و شي كايشوف؟؟؟؟؟؟؟؟

دعاونا للمعروف و داروا ما بغاوا

دعيتونا للمعروف
و درتوا المنكر.
أش كاتقول؟؟؟؟؟؟
مابقاش فيك الخوف....!!!!!!!
سمعتي حقوق الانسان
و انت تدصر.......

لا ما قلت والو.!!
جيت غير نشوف
واش باقي انت هو انت
و لا عدتي واحد خر

و الا كانوا كل الحكام
في سيفة الذياب
راه المحكوم عندو
خصايل الخروف
عاد كيف أضحية العيد
الموس في عنقه ينحر

حسرة عمرت لي حلقي
ما بغيت لا نسمع لا نشوف
الظلم و الفساد تفشى
ما لقيت لا ما نسبق لا ما نوخر

قريت قصايدي على حبابي
حد فيهم ما فرز الحروف
تسمع العجب و
ادخل سوق راسك
هذا الله علم تسطى
اوى الله يستر

و لفتوا اللقمة المذلولة
و ظهركم عواج بالحنيان و الخوف
و أنا راني كلمة الحق نقولها
و لو تتخلى داري من صلاة
العشاء حتى يؤذن الفجر

نترجاك يا اللطيف
تلطف بنا و انت تشوف
عبادك تعبد المال
و عاد قوام دينهم
السفاهة و قلة الدين و الشر

و نزيد نمجدك يا العلي
و نبتهل ليك يا رؤوف
ترزقنا ما يكفي قوت يومنا
و تزيد ترزقنا الكثير من الصبر

حيث بنادم يبغيك
على حساب الظروف
نهار تضحك ليه الدنيا
عليك يتنفخ و يتكبر

فصلوا لباسهم من الحرير
و احنا ولاد باب الله دربالة صوف
خشونة العيش زينة
تقربك من الله
و تزيدك في القدر

زكروم النحاس

تحاماوا على الضرع حلبوه
و منين نشف
عيطوا على مول النوبة

اللي كان شاد شي طريق
عليها قلبوه
و قالوا تخطيطنا هذا
و سياستنا المحسوبة

اللي طويل يتنقص
و اللي قصير جبدوه
كون كان الخير
في المقدم
ما يطلقوه في الدروبة

عندك شي مخطط ؟؟؟
أجي فباباهم نجربوه!!!
نترفحوا بعد حنا..
و نطلبوا من الله الثوبة

طاحوا على مخارج
الما و الخيرات
كلاوا شربوا
سدوا علينا بالسواقط

من كلا نجا و من جاع مات
واش طرا دابا ياك
الآخرة بالزراوط

أنا راه ماشي شغلي
و لكن كثروا فيكم الزلات
الدين راه نصيحة
للحر غمزة
و للحمير المشاوط

مشا وزير و بلاصاه خر
حالتي كيف كانت بقات
و عاد الطير الحر هايم في سماه
و نافر على اللقط

ليلة الجذبة

طلبنا ضيف الله ....
قلتوا مرحبا حكمتونا .....
من لحيتنا لقمتوا لينا!!!!!!

ايه يا مالين الدار ....
علقتوا لنا قرقبة..!!!
دخلنا للحومر رجعتوا ...
اللور تتفرجوا فينا.

ريحة الجاوي عطات..
و حمات الجذبة.!!
حمو هاج في دمه....
ايوى الله يعفو علينا .

في ليلة كناوية...
جنوني يهواو الدردبة.!!!
تذكر الله و تصلي على نبيه...
و تنقي القلب من كل ضغينة.

و صايتي ليك آ مجذوب ...
رد بالك في الرحبة.!
طمر و ثبت...لا تعود ....
طايح في فعايل شينة.

لا تثيق بمن يقول عنده
كرامات و يدير من الحبة قبة
راه كلشي بجهد العالي
القهار الحاكم للسفينة

سارق المنامة

سارق المنامة
و رفيق الندامة
حسنوا ليه بلا ما
قال ليك فيه الفهامة

شي لاعب ضامة
و شي بكى حتى عما
لمن تحكي زابورك يا داوود ....
على من تشكي
جنوس ما في قلبهم رحمة

سارق الفلوس
الرفيق المندوس
خصوا غير ما يسوس
في الأخر عاد محسوس

على كرامة الناس يدوس
نترجاك يا الله القدوس
تفنيه من فوق الأرض
و ترحمنا من هذا الكابوس


سارق البلاد
تجبر و شداد
دار كرش كيف البراد
طغا و ثبت الأوتاد

حنا كانتنقصو و هو كايتزاد
هما يعيشو و وصاونا بالجهاد
وخا بغاوها عوجة
مازال يجي نهار غادي تقاد

بوحليمة والسلوقي

شغلهم تقضى
و حنا لا
بقينا معلقين
بحال شي علافة

بفعايل ذميمة
و كذوب شلا
هاكذا بقاوا
لا دين لا ثقافة

جبناه يعاوننا
في راسو تهلا
كلا شرب
و ردنا حنا على الحافة

نهار تخصينا
قالوا لنا لا
دفع طلب و تسنى
نهار تكون شي اضافة


بوحليمة جمع
البيض كله في سلة
دار لراسو فرح
بالزغاريت و النقافة

فراسو لعجين
بان معقول ما يتفلا
لي طاحت تحت يديه
يدر لها منشفة

هذاك هو بوحليمة
وكال الغلة
نحكي لكم قصتي
معاه بحال الخرافة

نهار عرفتو
بين على الدين و الملة
و بقى يتملحس باش
يجمع لي رجلي باللطافة



الا كان هو ذيب
أنا سلوقي شفت أمور شلا
و الا كان هو موكة
أنا نسر نحس بالمصايب
قبل ما توقع كيف العرافة

جرى و تبربص ياكلني
و يلوحني عظام في الخلا
و مع من طاح صليب بن صليب
و صوفي مبين غير على الظرافة

و عيا يساومني
و بغاني على مبادئي نتخلى
و قلت ليك انت مع من
راني ديت و جبت في الدنيا
و درتها مني في القفا

اللي غلب يعف

الحمار غادي
سائق بلا غاية
و اللي تفتف
يطيح من بين يديه اللجام

لولادنا الصنعة
و لولادهم لقراية
تزاد في الدنيا حر
رجعوه عبد خدام

شحال بكيت على نهار
ثقت فيكم يا اولاد العرايا
شي مبردع في بردعة
و شي يحكم بالقلام

من طلب حقو يشوف
وجهو في المراية
و من تبعهم بقا
يد اللور و يد القدام

حكمتونا بالواجبات
قلنا ما كاين باس ا!!
و لكن حقوقنا فينا هي؟؟؟؟

المرجعية الدينية
و شي يضرب في الكأس!!
الحركات التقدمية!!

الوطن واش ديالنا كاملين؟؟
و لا غير لشي ناس ؟؟
المخططات المستقبلية

التعليم الصحة
طفى فينا الحماس....
معاملات لا انسانية..

تباع القرد ضحكتوا على من شراه!!!
ياك لاباس؟؟
ما كليت كرموص
ما طلعت حد ما قالها ليا!

حار لي امري وطاحت
لي البيضة في الطاس!!!
واش المرا اذا هرمت
تقضي معها محاربة الأمية...

شحال سهرت ليلي
و هجر عيني النعاس...
على شبابنا اللي ضاع
في انتظار وعود التسوية..

شوف و اسكت
تهضر كاين الحباس!!!!
و انقولوا الحبس؟
واش غادي تربطوا افكاري حتى هي؟؟؟؟

باراكا علينا من الطنز
و نديرو يد في يد نحفرو الساس
نعاودوا نبنيوا ما ريبتوا
بتصوراتكم المبدئية

شحال قدنا ما نغوتوا
واش غادي يسمعنا عباس؟؟؟
جميع الأحزاب مشغولة
بتوازناتها التنظيمية

كلام السايح

طبقتوا قانونكم على المسكين
و اللي بفلوسو زيدتوه يدير ما بغى

ما قدو حقو زدتوه حتى ديال لاخرين
زرعتوا الفتنة فاضت القلوب و كثر اللغا

سحت و جلت في بلادات الله
و لقيت جنسكم ما بحالو جنس فوق الأرض

كاين اللي ركب في السفينة و اللي عصى مولاه
و اللي باع ماء وجهو و تخلى على الشرف و العرض

واحد تبع الشهوة و عاد عبد دليل لهواه
و كاين اللي أول الدين طبق السنة و خلى الفرض

و قوموا يا ناس و توبوا لله
راكم عبدتوا المال و قلوبكم تفشى فيها المرض

آش من عذر يقدم العبد غدا يوم القيامة لمولاه
خليتوا تطلبوا الله و بديتوا
تزاوكوا في الموتى باش يتحقق الغرض

ناداني منادي في منامي
و قال لي يا ناظم الكلام رد بالك

رديت عليه واش عيب الا بحت بتخمامي
قال لي جمع راسك مع كحل الراس تقدر تصبح هالك

راهم داروا شلا فضايح
و على الأخر قالوا العروسة منحوسة

شي واقف و شي طايح
مهيف الكرش عايش حياة محسوسة

من لقاني يسالني على كلام السايح
قال لي شمو فيه ريحة ثورة مدسوسة

اللي تأمل أمركم يعود لحوايجو لايح
لا ثورة لا جهاد غير فقصة
فعايلكم الذميمة المرصوصة




الثورة عمر ما كان الكلام
المرصود فتيلة تشعلها
و اللي شك يسول من للناس هان
و ذلها في قوت يومها

قال ليك هذا كلام ثوري
يقدر يخل بالنظام
اللي خاف نجى و اللي
هضر يقول العام زين يا سلام

أنا بعد باسم الجلالة اقسمت
وا تخاذ القرار و كان اللي كان
نرصد و نفضح ولو داري تخلى
و نتشنق وسط الميدان

كلشي تباع ما بقى ما يتشرى
لا شرف لا دين لا ايمان
جا الجلاد خاطبني بفلقة و شوية ديال الضص
تعود تفكر و تشوف مزيان



حيت ولفوا مساكن اللي
في السما يسالوا فيها النص
و اللي في الأرض عليك فيها الأمان

حيث اللي ختاريناه يحكمنا
عاد فوق ظهرنا يدهسس
و يتجبر و يشوف راسو حاكم الزمان

و لو كان حكيم لتخمامو يوزن
و براسو ما حس
يشوف شحال من ظلام قبلو دازو
طغاوا من بعد طواهم النسيان

الله يحضر السلامة - قصيدة زجلية - تضامنا مع مدير المشعل المعتقل بسجن الزاكي بسلا

داومت على صلاتي
صمت و زكيت
و فهمت باللي الدنيا
دين و غرامة

ما عصيتك يا ربي
و لواجباتي أديت
تناحسوا معايا
بانت فيهم العلامة

ما بقيت نرصد الكلام
و لقراري خذيت
الشغل بدا يخلع
فيه الحبس و المحكمة

اللي عبر على رأيو
يحكموه العفاريت
بغيتوا تسكتونا
بالعقاب و الندامة

كلكم ترفحتوا
و أنا كيف ما كنت بقيت
دين و ملة و استقامة

راه بلا حرية أنا بعدا
منكم قلت خزيت
و نطلب منك آلعالي تحضر السلامة !!!!!!

النية العوجة

درت النية فيكم كيف
دارها العمى في عكازو

تبعناكم في لغاكم
درتوا لنا من هنا دازوا

غوت غوتة مجذوبة
قلتوا آلواه

زدت صحت صيحة مغلوبة
و قلتوا عطي لباباه

تصاب طاح و ناض
ما كاين اللي واساه

نهار زيادتو عوقت موكة
قالوا المولود صكع

ضحكنا معاكم بقيتوا
في حلقنا شوكة

اللي مشا ما رجع
شرفناكم تجدفوا بالفلوكة

تعلمتوا فينا الطرح و الجمع

حكام قاراقوش

اللي قال العصيدة باردة
يدير فيها يديه

و اللي شرا اليوم ما
دار بحساب غدا
للزوبية واليه

العربي المذلول مشا ليه حقو
بغا يردو بالتصياح

المؤتمرات كلشي كايقول
و الكلام داتو الرياح

كل حاكم يقلب على رباحو
يبيع بلادو على الصباح

و كل محكوم حد ما سمع نواحو
شي يشرق و شي يغرب ما بقا صلاح

واش علا حقنا صيحنا حتى عيينا
ما كاين والو نقلبوها استنكار
شكون سمعنا و شكون داها فينا
آش هاذ الاستهتار

العرب جرب دارو بيناتهم العاهد
عمرهم يتجمعوا على كلمة

الأمين طردوه
و قليل النية يقرب
بقرة سمينة نحلبوها و يحن
الله منين نوصلوا تمة

جنس قصيف ياكل ما يشبع
كرشو ما فيها ضلوع
و كثيرة فيه الفهامة

مشا الزين بقات حروفو تسطع
مازال جاي نهار ترجع معاكم الندامة

حيت اللي خان طعام ما هو ليه
يبرك ليه في الركابي

و اللي ما وفا بعهد و للأمانة سرق
قليل الترابي

خرجتوا علينا و على
البلاد بفعايلكم الشينة
و سياسة باك صاحبي

تمنيناكم تكونوا
لينا عماد خذلتونا
و درتوا راسكم في
مقام الله و النبي

يا حكام يا عرب
جمعوا راسكم علينا
راه مشى زمان اللي هجم
على شي بلاد يعود ينهب و يسبي

و يا محكوم دير لراسك العز
الحق ما يتهدى يتخاذ عنوة
و ما يحققوا لا استغفار
لا صلاة على النبي